الرفيسة .......

السلام عليكم و رحمة الله تعالى و بركاته

بناتي تشاهاو الرفيسة و اليوم حداكيت و عملتها ليهم و جيت نشارككوم طريقتي و ان شاء الله تعجبكم



انتم عارفين فطيابنا البلدي كنعتمدوا عالبركة كثر من كنعتامدوا عالقياس
فعلى بركة الله عملت
الدجاج وانت وقياسك هنا عملت نصف دجاجة مغسولة مزيان بالملح و الحامض بليلة قبل و مستقطرة
ضفتلها بصلة كبيرة مقطعة مربعات و قليتهوم على عافية مهيلة فكاس العنبة دالزيت البلدية و الرومية مخلطين
ضفتلهم شوية القزبر و المعدنوس و الملح و الثوم مقطع و الابزار سكين جبير بزايد الخرقوم و الزعفران بنوعيه و الا معندكومش ممكن تعملوا ضامة البنة دالزعفران
قليت الكل مزيان لدقائق و ضفت لقياس دالماء المناسب هنا زوج كيسان كافيين
على متغلى الطاوة وجدة 4حبات البصلة قطعتهوم جوانح واضفتهم للطاوة مع ربيطة صغيرة القزبر و شوية الحلبة خاصها تكون بايتة ليلة فالماء باش ترطاب عملتها فطرف ثوب وضفت راس صغير ثومة صحيح
وخليت الكل يطيب على عافية متوسطة
5د الاخيرة كنضيف لمساخن و معلقة السمن ومعلقة القزبر مدقوق باش كيحتفظوا بالنكهة و تكون رفيستنا شهوة منها و ريحتها واصلة لراس الدرب ههههه

هالمريقة مدغمرة وواجدة وسخونة كتسنى غير المسيمنات



وهطريفات الدجاج كيتحمروا شهوة منهم هاكدا كيبغيوهم عندي فالدار

والمسيمنات بدل منفورهوم كنعملهوم فالفران احسن باش كيشربوا غير لقياس دالمرقة و مكيتعجنوش و هنا سخنتهوم غير عالبوطة

لعجز و ما يهمل
وعلى فكرة مسيمنات الرفيسة خاصهوم يكونوا شوية ناشفين انا كنعجنهم بخليط متساوي من الفورص و الفينو و كنورقهوم غير بالزيت البلدية و مكنكترش منها